(Видео) 1000 наслови библиотечен фонд во е-библиотеката на УГД

Универзитетот „Гоце Делчев“ достигна 1000 наслови во својата електронска библиотека. По тој повод денес раководителката на Центарот за издавачка дејност, проф. д-р Лилјана Колева-Гудева, раководителот на Центарот за е-учење, проф. д-р Зоран Здравев и ректорот на УГД, проф. д-р Дејан Мираковски, одржаа заедничка прес-конференција. На прес-конференцијата беа истакнати придобивките од електронската библиотека, но и понатамошниот развој на УГД во насока на дигитализацијата на високото образование. Во продолжение видеото од целата прес-конференција и информации за електронската библиотека.

Уште од своето основање, Универзитет „Гоце Делчев“ - Штип направи значајни чекори за креирање на сите потребни капацитети кои ќе ја развиваат издавачката дејност како клучна дејност на секоја високообразовна институција. Издавачката дејност опфаќа обемен и комплексен сегмент од работењето на Универзитетот.

Низ изминативе 16 години постоење на УГД, издавачката дејност е како потпорен ѕид и поддршка на сите активности кои се одвиваат на Универзитетот и на своевиден и препознатлив начин ја пишува историјата на УГД. Почетоците во овој сегмент воопшто не беа лесни. Се печатеа книги, учебници и учебни помагала, се трошеа многу универзитетски средства неповратно за да поголем дел од нив стојат на рафтовите во книжарниците. Во периодот од 2007 до 2010 Универзитетот „Гоце Делчев” како издавач отпечати над сто изданија на учебници и учебни помагала и исто толку книги кои се продаваа во книжарниците на кампусите во Универзитетот, како и дополнителна литература од други издавачи.

Поаѓајќи од својата мисија за современ пристап во издаваштвото, УГД во 2011 година имплементираше електронската библиотека која отвори нова можност за изразување и презентирање на издавачката дејност. Напредните информатички и комуникациски технологии, како и новите техники за научно истражување, налагаа промовирање на современ пристап во методите на наставната и во истражувачката дејност. Тоа создаде потреба да се промовира нов и современ пристап во издаваштвото што беше наша водечка идеја во формирањето на дигиталната универзитетска библиотека. За да бидеме во чекор со светскиот тренд во електронскиот пристап на универзитетските изданија УГД започна со подготовката на нова алатка, е-библиотеката на порталот на нашиот Универзитет. Така се отвори нов и мултимедијален пристап за брза, точна и бесплатна информација, како за студентите, така и за професорите и истражувачите. Е-библиотеката отвори нова можност за изразување и презентирање на издавачката дејност на Универзитетот која ги опфаќа високообразовните, научноистражувачките и стручно-апликативните публикации на сите петнаесет единици.

Денес сме сведоци како е-библиотеката на УГД континуирано и секојдневно се збогатува со нови содржини, учебници и учебни помагала од сите 15 единици на Универзитетот. Електронската библиотека располага со 1000 наслови библиотечен фонд, овозможува мултимедијален пристап и претставува база на сите изданија, учебници и учебни помагала на УГД. Пристапот до е-библиотеката е едноставен, брз, препознатлив за современото работење на овој современ Универзитет, а сите изданија им се бесплатно достапни за вработените, студентите и на целокупната јавност на линкот

https://e-lib.ugd.edu.mk/naslovna.php

Во својата шеснаесетгодишна високообразовна и научноистражувачка работа, Универзитетот „Гоце Делчев” - Штип објавува каталози на изданија, како годишен преглед на издавачката дејност. Сите досега објавени каталози на изданија се јавно достапни во е-библиотеката на УГД на линкот

https://e-lib.ugd.edu.mk/e-katalozi.html

Универзитетот им припаѓа на студентите и сите активности што ги презема Универзитетот се наменети токму за нив. Во таа насока, се обезбедува и современ пристап во издавачката дејност. Одржувањето и збогатувањето на библиотечниот фонд од академски учебници и учебни помагала во електронската библиотека на Универзитетот „Гоце Делчев” - Штип е водечка идеја во реализација на издавачката активност на академската заедница.

Издавачка дејност на УГД 2007 – 2023 низ бројки, според податоци на Комисијата за издавачка и нормативна дејност

Год.	Годишен план ИД во МКД	Исплатен авторски хонорар МКД	Пријавени изданија вкупно	Пријавени / реализирани учебници	Процент на реализирани учебници	Универзитетски билтен бр. (од-до)	Универзитетски гласник бр. (од-до)
2007	-	-	-	-	-	1-4	1-2
2008	1.400.000	-	-	-	-	5-13	3-6
2009	1.800.000	-	4	-	-	14-33	7-12
2010	2.500.000	-	38	29/6	20,60%	34-51	13-17
2011*	3.000.000	487.800	66	20/12	60%	52-72	18-12
2012	3.000.000	514.650	183	104/13	12,50%	73-94	22-25
2013	1.700.000	936.620	222	55/30	54,40%	95-116	26-29
2014	1.700.000	822.670	272	64/33	51,50%	117-138	30-32
2015	1.900.000	756.470	240	67/27	40,29%	139-161	33-34
2016	2.000.000	488.300	249	91/14	15,38%	162-182	35-36
2017	2.000.000	980.300	237	97/22	22,60%	183-203	37
2018	2.500.000	1.508.950	284	126/37	29,36%	204-224	38-39
2019	2.500.000	1.627.160	190	90/36	40%	225-244	40-45
2020	2.500.000	1.447.030	219	109/32	29,35%	245-268	46-48
2021	2.500.000	1.402.627	246	116/29	25%	269-289	49-51
2022	2.500000	1.287.940	232	124/31	25%	290-312	52-22
2023	2.500.000	во тек	255	144/во тек	во тек	313-	56-