Традиционално, Економскиот факултет при Универзитетот „Гоце Делчев“ го одбележа 10 ноември, Денот на сметководството. На настанот беа присутни голем број студенти, професори и гости сметководители кои ја истакнаа важноста на професијата и иднината на сметководството.
Настанот го отворија проф. д-р Весна Ѓорѓиева-Свртинов и проф. д-р Емилија Митева-Кацарски од Економски факултет.
Проф. д-р Благица Колева ги истакна предизвиците со кои се соочува сметководствената професија во Македонија, а воедно ја истакна и важноста од оваа професија кај сите сектори во општеството.
На настанот беа присутни и гости-предавачи кои имаа за цел да споделат поенти и идеи за унапредување на оваа професија и да ги поттикнат младите да се вклучат во професијата сметководител. Гости-предавачи беа: Коста Костадиновски, член на Советот за унапредување и надзор на сметководствената професија, Весна Филипова, директор на Дирекцијата за финансии, сметководство и контрола на Народната банка на РС Македонија и Анита Миланова, студентка на постдипломски студии на Економски факултет на УГД.
„УГД го чувствувам како мој дом, со оглед на тоа што овде го продолжив моето студирање. Образованието и знаењето кое ќе го стекнете на Економскиот факултет е од огромно значење за вашата идна кариера“, истакна студентката Миланова.
На настанот се одржа и панел-дискусија на која главна тема беше сметководствената професија, перспективите и предизвиците. Панелисти беа: проф. д-р Јанка Димитрова од УГД, Весна Прентоска, претседател на Институтот за сметководители и овластени сметководители, Драган Димитров, претседател на Институтот за овластени ревизори, Благоја Грозданов, претставник на Комората на сметководители, Никола Митев, советник на Друштво за сметководствени работи, Симона Трајкова и Вероника Гравчева, овластени сметководители.
Joomla Gallery makes it better. Balbooa.com
