Преку 20 студенти од многу европски држави денес имаа церемонија на добредојде на Универзитетот „Гоце Делчев“. Добредојде им посакаа проректорката за меѓународна соработка, проф. д-р Ана Никодиновска-Крстевска, студентите на УГД, како и дел од тимот на Канцеларијата за меѓународна соработка при Универзитетот. Студентите споделија многу интересни приказни, се запознаа меѓусебно и имаа ден за ориентација. Особено интересно беше што двајца од студентите по вторпат го избрале УГД како место каде што ќе поминат Еразмус размена.
- По втор пат сум во Штип, на истиот Универзитет, и навистина имам убаво искуство овде. Ова е мое трето Еразмус искуство, две од овој Универзитет и едно од универзитет во Шпанија. Македонија е убава земја, има многу работи што можат да се видат. Универзитетот посветува многу внимание на практичната настава, нешто што недостасува на мојот универзитет во Италија - вели Алесандро Лаи од Универзитетот „Сасари“ во Италија.
Проректорката на УГД на сите им посака добредојде и им порача дека во наредниот период УГД ќе биде нивни партнер:
- Се надевам дека ќе поминете добро во наредните неколку месеци овде во Македонија. Ние сме благодарни и почестени што од сите универзитети во Европа, вака голем број студенти го избрале токму Универзитетот „Гоце Делчев“ во Штип.
Годинава има студенти од Шпанија, Италија, Полска, Турција и Литванија. Сите се на различни факултети, а УГД годишно прима преку 50-тина студенти преку програмата Еразмус.
- Првпат сум во Македонија и досега е многу интересно. Луѓето се љубезни, добро е организирано и се надевам ќе научиме многу - вели Ивета Сареико од Универзитетот „Вилнус“ во Литванија.
Дел од искуствата на студентите и причината што го избрале Универзитетот „Гоце Делчев“ ќе погледнете во видеото во продолжение.
Joomla Gallery makes it better. Balbooa.com
