Наградата за истражувачко новинарство на ЕУ за 2023 година ги слави најдобрите истражувачки приказни објавени во претходната календарска година и се доделува само за Турција и земјите во Западен Балкан.
Крајниот рок за поднесување на пријави е 20 јуни 2023 година, до полноќ по средноевропско време.
Оваа година, освен националните награди, наградата на ЕУ воведува и регионална награда, насочена кон најдобрите приказни од целиот регион врз основа на јасно дефинирани критериуми. Оваа нова категорија е возбудлив развој што ќе ги охрабри новинарите да размислуваат надвор од националните граници и да се занимаваат со прашања кои го засегаат целиот регион.
Годишниот награден фонд за секоја од земјите, како и наградниот фонд за регионалните награди е 10000 евра. Наградени ќе бидат трите најдобри приказни на годината, а сумата за национални и за регионални награди е 5000 евра (за прво место), 3000 (за второ) и 2000 евра (за трето).
Приказните што може да бидат номинирани треба да придонесат за слободата на изразување, владеењето на правото и транспарентноста.
Тие треба да опфатат различни теми кои ги засегаат националните и регионалните економии; борбите и предизвиците за процесите на интеграција во ЕУ; општествата и перспективите на земјите, на пр. организиран криминал, корупција, пораст на екстремизмот, различни форми на странско влијание, кршење на човековите права, вклучително и оние во дигиталната сфера, како и други теми кои се помалку достапни за јавноста.
Пријавите може да бидат номинирани за националната или за регионалната награда или, пак, за двете, а оваа можност се нуди преку самата апликација. Освен тоа, еден кандидат може да се пријави на конкурсот со повеќе приказни.
Добитниците на националните награди во регионот на Западен Балкан и Турција автоматски стануваат кандидати за регионалната награда на ЕУ за истражувачко новинарство, ако тоа е наведено во нивната апликација. Жирито и за националните и за регионалните награди го сочинуваат локални и меѓународни медиумски експерти, уредници, членови на академската заедница и новинари со заслуги.
Организатор на наградата е Thomson Media, организација со децениско искуство во развојот на медиумите и промоцијата на слободата на медиумите на глобално ниво.
Наградата на ЕУ за истражувачко новинарство за 2023 е дел од проектот „Зајакнување на квалитетното новинарство во Западен Балкан и Турција II“. Ова има за цел да ги препознае и промовира извонредните достигнувања во истражувачкото новинарство, како и да ја подобри видливоста на квалитетното новинарство во Западен Балкан и во Турција.
Проектот е финансиран од Европската Унија, а го спроведува конзорциум составен од Балканска мрежа за истражувачко новинарство – BIRN Hub, Central European University (CEU) – Унгарија, Association of Journalists (AJ) – Türkiye, Thomson Media (TM) – Германија, Универзитет „Гоце Делчев“ во Штип (УГД) – Северна Македонија, Самостојниот синдикат на новинари и медиумски работници (ССНМ) – Северна Македонија, Медиумската асоцијација на Југоисточна Европа (MASE) – Црна Гора и Балканската мрежа за истражувачко новинарство Косово (БИРН Косово).
Потребни документи за пријава се:
1. EU-Award_Call-for-Applications_2023_MKD-(Macedonian)(.docx)
2. EU-Award_Instructions-for-Submitting-Proposals_2023_MKD-(Macedonian)(.docx)
3. EU-Award_Application-form_2023_MKD-(Macedonian)(.docx)
4. EU-Award_Statement-of-Consent_2023_MKD-(Macedonian)(.docx)
