Обраќање на Ректорот

Почитувани студенти,

Добре дојдовте на Универзитет „Гоце Делчев“ во Штип. Универзитетите постојат за вас, младите. За развој, оформување и унапредување на вашиот потенцијал. Ова е место каде што го осмислувате вашиот нов животен предизвик. Доколку сте водени од желбата за знаење ќе имате можност да израснете во академски граѓани во вистинска смисла на зборот - градители на нашето општество. Зашто, целта на образованието не е само знаење, туку и поттик за акција, а основата за градење на напредно општество е образувана младина.

Универзитетот „Гоце Делчев“ во досегашното постоење успеа да наметне низа иновации во дејноста на високото образование. Ќе продолжиме да се стремиме кон целосна интеграција во европскиот високообразовен простор и трансформација во отворен, инклузивен и истражувачки универзитет. Универзитет подготвен да одговори на динамичните промени во современото живеење и преку своите наставни и научноистражувачки активности да даде значаен придонес за подобрување на средината во којашто живееме и работиме.

Воден од мотото „Компетентност и хуманост“, сакам заедно со сите вас да продолжиме да го градиме УГД како место на компетентни и силно мотивирани студенти, професори и вработени, но и да изградиме универзитет што ќе ги негува и надградува највисоките хумани вредности кон кои се стреми цивилизираниот човек. Должни сме, заедно, да создаваме бенефит за општеството во коешто функционираме и припаѓаме.

Затоа, мојата порака до вас е:

• Учете со голема страст за знаење, затоа што со учење никогаш не ќе престанете да растете;
• Образувајте се како да нечиј живот зависи од вашето умеење, затоа што најмалку вашиот, сигурно ќе зависи од него;
• Надградувајте се континуирано, затоа што знаење кое не се обновува и зголемува, исчезнува;
• Бидете проактивни и гласни, како да ја имате најоригиналната идеја на светот;
• Делувајте одлучно кога станува збор за вашата иднина!

Затоа што вашата иднина е иднината на светот.

Почитувани бруцоши,

Студирањето е време кога ќе ги доживеете најубавите денови од вашиот живот, ќе создадете нови и трајни пријателства, ќе се вивнете над сопствените очекувања, ќе ја отворите вратата кон нов свет, таков каков што ќе го создадеме заедно. Студирањето на нашиот Универзитет не се само книгите, библиотеките, предавалните, амфитеатрите, клиниките... УГД е место на разбирање и почит меѓу студентите и професорите, место на активен социјален живот, место на кое се почитуваат различностите, се негуваат моралните и етички норми, се раѓаат пријателства, се создаваат семејства.

Вие, заедно со професорите и вработените, сте најзначајниот дел од нашата визија и мисија за подобар, посилен и хуман Универзитет.

Ви посакувам среќен и успешен почеток!

Благодарам!